Fastlandssida ved Herøysundet i 1904. Posthuset med telegrafstasjon og bustadhus for Gjert Helvik sin familie midt i biletet. Til høgre handelsbua hans, og lengst til høgre den nye smørfabrikken. Gjert Helvik sette også tidleg opp det vesle bustadhuset bak handelsbua. Dette vart seinare bustad for sonen, Helge Helvik, og kona hans Konstanse. Til venstre for postkontoret ligg ei sjøbu som opphaveleg høyrde til eitt av bruka i Bringedal, og bak den ser vi huset til landhandlar Haktor Sørensen der svigersonen, Jens Hjelmeland, etablerte seg med handel og treskjerarforretning. Lengst til venstre ser vi forretningsbygget til Andrea og Andreas Bringedal med bustad og pensjonat i etasjane over. I bakgrunnen er huset som Ole Olson Onarheim bygde i Skjøndal, under oppføring.
Klyngjetunet i Bringedal slik det såg ut i 1874. Bygningane på det som vart bnr. 1 og 4 står til høgre for sjøssvegen, og bygningane på bnr. 2 til venstre. Gardbrukaren på bnr 2 var i ferd med å flytta bygningane sine ut av klyngjetunet. I høgre hjørnet på kartet ser vi det kombinerte bustadhuset og fjøset på husmannsplassen Perahaugen.
Nyeste kommentarer